პროფესიული განვითარება ორგანიზაციაში უწყვეტი
პროცესია. საჯარო დაწესებულების სამუშაო პროცესები, პროცედურები, ინსტრუქციები, ელექტრონული
ტექნოლოგიები მუდმივად ახლდება. იცვლება დაწესებულების სტრუქტურა და ფუნქციებიც, რომლებიც
ხშირად ახალი ორგანიზაციული მიზნების/ოპტიმიზაციის საჭიროების შესაბამისად ფართოვდება ან/და
გადაიხედება. დაწესებულებებს მუდმივად უჩნდებათ
ახალი გამოწვევები, რაც მოითხოვს ახალ დამატებით
ინფორმაციასა და განსხვავებულ სამუშაო მიდგომებს. ამ კონტექსტში ძალზე მნიშვნელოვანია, მოხელე და საჯარო დაწესებულება ზრუნავდნენ ცოდნის,
კომპეტენციების, პროფესიული, ტექნიკური და სოციალური უნარ-ჩვევების განვითარებაზე.

საჯარო სამსახურის რეფორმის ფარგლებში დამტკიცდა და ამოქმედდა ახალი კანონი საჯარო სამსახურის
შესახებ, რომელიც განახლებულ რეგულაციებს აწესებს ადამიანური რესურსების მართვის სფეროში. ერთერთი მნიშვნელოვანი სიახლე მიზნად ისახავს მოხელის პროფესიული განვითარების ხელშეწყობას და ამ
თვალსაზრისით საჯარო დაწესებულების გამართული ფუნქციონირების უზრუნველყოფას.

ყოველი საჯარო დაწესებულების ადამიანური რესურსების მართვის ერთეული
ვალდებულია, შეადგინოს მოხელის პროფესიული განვითარების ყოველწლიური
გეგმა. გეგმა შედგება პროფესიული განვითარების საჭიროებების განსაზღვრისას
მიღებული მონაცემების საფუძველზე.
პროფესიული განვითარების გეგმის ფორმა საერთოა ყველა საჯარო დაწესებულებისთვის და ის ინდივიდუალური ადმინისტრაციულ-სამართლებრივი აქტით
დამტკიცებულია საჯარო სამსახურის ბიუროს უფროსის მიერ.